A kloana Bua
Juli 2000
Jo, monchmoi kimmts ma wirkli vua
als wär i no imma a kloana Bua.
Do siach i mein Voda beim Korten zölln
und mi söba im Obstbam die Kirschn stölln.
Da Bauer schreit aufi: „Du Krippl, geh zua!“
Sechts, Leitl, des losst ma bis heit noch koa Ruah.
Jo, monchmoi kimmts ma wirkli vua
als wär i no imma a kloana Bua.
Oanmol wuitn die Öltan, s’is Weihnochtn gwen,
noch da Bescherung noch wo onders hin gehn.
Kaum worns furt, san ma schon ins Zimma grennt
und glei ham wiada die Kerzn brennt.
Walls gor so schen wor! O liabliche Ruah!
Do hot glei da ganze Bam brennt aa nou dazua.
Mir ham glöscht wia die Wüdn mit Wossa und Deckn
und ham uns nocha miassn in oan Zimma vasteckn.
Mir ham gwusst: Nocha gibt’s wos auf d’Schwortn;
do brauchst beim Voda net long drauf z’wortn.
Jo, monchmoi kimmts ma wirkli vua
als wär i no imma a kloana Bua.
A onderes Mol, i woass es noch wia heit,
do hot da Voda an Schreck kriagt, du liabe Zeit!
Er wuit mit uns zum Schreiber, Eis essn gehn;
mir ham uns schon gfreit: Mei, woar des schen.
Vier Buam an zwoa Händ’, des geht net guat;
do woar da Kloanste a scho furt.
Reisst si los und rennt iba d’Strossn,
do kimmt a Auto, tuat eahm erfossn.
Er mocht an Schrei! Schock, schwere Not,
hamma uns denkt: Der Bua is tot!
Da Voda hot eahm langsom vom Auto wegzogn;
s’wor gor net so schlimm, nur s’Gsicht wor verbogn!
Er hot dann alloani des Eis aufgessn
und di andern drei san brav daneben gsessn.
Jo, monchmoi kimmts ma wirkli vua
als wär i no imma a kloana Bua.
Da Alex wuit amoi Radio hearn;
na jo, er mog hoit Musi gor so gern.
Kraxelt aufi auf d’Kredenz, damit er s’Radio einschoit
und verliert dabei iba si söba die Gwoit.
Er foit und di Muada siacht nou gonz entsetzt,
wia er si mit’m nockatn Orsch aufn Spiralkocher setzt.
Er is zwoar glei schreiend wiada obaghupft
und d’Muada hot eahm ganz zoart den Hintern otupft,
oba es wor schon passiert, vorbei und gschegn
und die Spiraln vom Kocher hot ma no johrelong gsegn!
Hiatzt is er aufs Radio nimmer so hass;
Na, des Fernsehn mocht eahm vüll mehr Spass.
Jo, monchmoi kimmts ma wirkli vua
als wär i no imma a kloana Bua.
Aa nocha, in die späteren Joahrn
is es bei uns net vüll besser worn.
Da Voda wor von da Schul aus in Wien,
do geht da Peter gonz frech zur Werkstott hin.
Er hot koan Führerschein, man konns net fossn,
hot er si des Auto vom Voda gebn lossn.
Mit seine Freind mocht er a Spritztour
und des scheint eahm aa no net gnua.
Immer schnölla muass es gehen und ganz gach
kimmt a Kurven und es tuat an Riesenkrach.
Im Grobn ausm Auto da Peter aussakriacht:
Oje, wann des da Voda siacht!
Jo, monchmoi kimmts ma wirkli vua
als wär i no imma a kloana Bua.