I sog eich wos (Version 2)
März 2015
In Frohnleiten bin I imma so inspiriert,
do hob I a kloans Gedichtl produziert.
I sog eich wos: I bin so froh –
endlich samma wieda do!
Des gonze Joahr hob I mi scho gfreit
auf Frohnleiten – und auf eich, liabe Leit!
Warum I mi gonz besonders gfrei –
unsa Biagamoasta is aa wieda dabei.
Ois Öltestn zum guatn Schluß
begriaß I unsern Alban Vigelius
und ohne sie kummt er nie –
griaß di, liabe Annemarie!
---
Bevor mi noch hundert Leit frogn,
wüll i eich glei amoi wos sogn.
Monche ham des vielleicht scho gsegn,
mit mir is seit letztn Joahr wos gschegn.
Naa, zum Glick woar I ned kronk;
Mir geht’s wirkli guat, gottseidonk.
Obwui mei Frau sogt – de is so gemein - ,
wirkli gonz gsund kennat i ned sein!
I hob mir vurgnumman, dass i bis Ostern hin
mit meim Gwicht unter ochtzg Kilo bin.
So hob i hoit gstrompelt aufm Radl im Kölla;
erscht langsom und donn imma schnölla.
I hätt’ ma nia denkt, daß i in an hoibn Joahr
fost sechstausend Kilometer foahr!
Hiatzt bin I über siebzehn Kilo los
und ob heit gibt’s wieda Knedl und Soss.
Oans kann i eich aa glei varrotn,
dazua gibt’s an gscheiten Schweinsbrotn!
Leider hamma net vüll Zeit zum dazöhln,
es geht glei weida, mir tan jo heit wöhln.
Do wüll I net long ratschn und drum
sog I nur, dass I gern noch Frohnleiten kumm
und fia mi do mocht des a wirkli Sinn,
wall I aus tiafstn Herzn a Frohnleitner bin!
I bin da Bobby und do bin I dahoam!
Hiazt miass ma schaun, dass ma weida tan,
damit ma nocha net so spät fertig san
und damit koana vor lauda Hunga zsammanbricht,
moch I jetzt gschwind noch mein Tätigkeitsbericht!